ဗီယက်နမ်နိုင်ငံ၌ ဗီဇပြောင်းကိုရိုနာဗိုင်းရပ်စ် ကူးစက်ခံရသူ ပထမဆုံးတွေ့ရှိ 

ဟနွိုင်း   ဇန်နဝါရီ   ၂ 

ဗီယက်နမ်နိုင်ငံ၌  ဗီဇပြောင်းကိုရိုနာဗိုင်းရပ်စ် ကူးစက်ခံရသူ တစ်ဦး ပထမဆုံးအကြိမ် စတင်တွေ့ရှိခဲ့ကြောင်း ဗီယက်နမ် ကျန်းမာရေးဝန်ကြီးဌာနက ယနေ့ပြောကြားခဲ့သည်။ 

အဆိုပါကူးစက်ခံရသူသည် ဒီဇင်ဘာ ၂၄ ရက်က ဗြိတိန်နိုင်ငံမှ  ဗီယက်နမ်နိုင်ငံသို့  ပြန်လည်ရောက်ရှိခဲ့သည့် အသက်  ၄၄  နှစ်အရွယ်   အမျိုးသမီးတစ်ဦးဖြစ်သည်။ ဗီယက်နမ်နိုင်ငံသို့    ပြန်လည်ရောက်ရှိခဲ့စဉ်    ၎င်းအား 
ကိုဗစ်-၁၉ ရောဂါပိုး ရှိ၊ မရှိ စစ်ဆေးမှုပြုလုပ်ခဲ့ရာ ၎င်းထံ တွင်  ဗီဇပြောင်းကိုရိုနာဗိုင်းရပ်စ် ကူးစက်ခံထားရကြောင်း သိရှိခဲ့ခြင်းဖြစ်သည်ဟု ကျန်းမာရေးဝန်ကြီးဌာန၏ ထုတ်ပြန် ချက်တွင် ဖော်ပြထားသည်။ 

ဗြိတိန်နိုင်ငံမှ     စတင်တွေ့ရှိသည်ဟု   ယူဆရသည့်  အဆိုပါ    ဗီဇပြောင်းကိုရိုနာဗိုင်းရပ်စ်သည်   ကိုဗစ်-၁၉ ရောဂါထက် ၄၀ ရာခိုင်နှုန်းမှ  ၇၀  ရာခိုင်နှုန်းအထိ ကူးစက်မှု   ပိုမိုမြန်ဆန်ကြောင်း  စစ်ဆေးတွေ့ရှိရသည်။   လက်ရှိ အချိန်တွင်  ကမ္ဘာ့နိုင်ငံအများစုကလည်း   ဗြိတိန်နိုင်ငံမှ  လေကြောင်းလိုင်းများကို  ပိတ်ပင်ထားကြောင်း သိရသည်။

သို့သော်    ဗီယက်နမ်နိုင်ငံသည်    ဗြိတိန်နိုင်ငံမှ ဗီယက်နမ်နိုင်ငံသားများအား    ပြန်လည်ခေါ်ဆောင်ရေး လေကြောင်းခရီးစဉ်ကို   လက်ရှိအချိန်အထိ  ပြေးဆွဲခွင့် ပြုထားသည်။ 

ဗီယက်နမ်နိုင်ငံအတွင်း ကိုဗစ်-၁၉ ရောဂါ ကာကွယ် တားဆီးရေးဆိုင်ရာ  စည်းမျဉ်းများကို  တင်းကျပ်စွာချမှတ် ထားသည့်အတွက်  ဗိုင်းရပ်စ် ကူးစက်ပျံ့နှံ့မှုအခြေအနေကို လျင်မြန်စွာ  ထိန်းချုပ်နိုင်ခဲ့သည်။    လက်ရှိအချိန်အထိ ဗိုင်းရပ်စ်ကူးစက်ခံရသူ ၁၄၈၂ ဦးရှိပြီး သေဆုံးသူ ၃၅ ဦး ရှိကြောင်း သိရသည်။ 
                  
 ကိုးကား - စီအင်န်အေ
  ဘာသာပြန် - အောင်ကျော်ကျော်