ကိုဗစ်ကာကွယ်ဆေး အလားအလာကောင်း သမ္မတ Trump ဂုဏ်ယူပြောဆို

ကိုရိုနာဗိုင်းရပ်စ်ရောဂါအတွက် ထိရောက်တဲ့ ကာကွယ်ဆေးတခု ရတော့မယ့် အလားအလာ တိုးတက်မှုရှိလာတဲ့အပေါ် သမ္မတ Donald Trump က သောကြာနေ့မှာ ဂုဏ်ယူပြောဆိုခဲ့ပါတယ်။ ဒါဟာ နိုဝင်ဘာလ ၃ ရက်နေ့ ရွေးကောက်ပွဲမှာ ဒုတိယသမ္မတဟောင်း Joe Biden အနိုင်ရတယ်လို့ ကြေညာခဲ့ပြီး ၆ ရက်မြောက်နေ့မှာ အများပြည်သူမြင်ကွင်းရှေ့ သမ္မတ Trump ပထမဆုံးအကြိမ် စကားပြောဆိုတာ ဖြစ်ပါတယ်။

ရွေးကောက်ပွဲရှုံးတယ်ဆိုတာကို လက်မခံသေးတဲ့ သမ္မတ Trump ဟာ အိမ်ဖြူတော် နှင်းဆီဥယျာဉ်မှာ စကားပြောခဲ့တာဖြစ်ပေမယ့် သတင်းထောက်တွေ မေးမြန်းတာကိုတော့ မဖြေခဲ့ပါဘူး။

ကိုဗစ်ရောဂါကာကွယ်ဆေးရဖို့ လုပ်ဆောင်နေတာတွေဟာ အမေရိကန် သမိုင်းတလျှောက် ကာကွယ်ဆေးတခုရဖို့ လုပ်ဆောင်ချက်မှာ အကြီးမားဆုံး စုပေါင်းလုပ်ဆောင်မှု ဖြစ်တယ်လို့ သမ္မတ Trump က ပြောပါတယ်။ ထိရောက်တဲ့ ရောဂါကာကွယ်ဆေးတခုကို ထုတ်လုပ်ဖို့အတွက် ပုံမှန်အားဖြင့်ဆိုရင် ၈ နှစ်ကျော်ကြာတယ်လို့လည်း ဆိုပါတယ်။

အမေရိကန် ဆေးဝါးထုတ်လုပ်ရေး ကုမ္ပဏီကြီးဖြစ်တဲ့ Pfizer က ကိုရိုနာဗိုင်းရပ်စ် ကာကွယ်ရေးအတွက် ၉၀ ရာခိုင်နှုန်း ထိရောက်မှုရှိတဲ့ ကာကွယ်ဆေး ထုတ်လုပ်နိုင်ပြီလို့ ပြီးခဲ့တဲ့ တနင်္လာနေ့က ကြေညာခဲ့ပြီး "သိပ်ကောင်းတဲ့သတင်း" ပဲလို့ သမ္မတ Trump က တွစ်တာမှာ ရေးခဲ့ပါတယ်။ ဒီကာကွယ်ဆေးကို စမ်းသပ်တာတွေ အပြီးသတ်ဖို့လိုသေးပြီး အမေရိကန် အစားအစာနဲ့ ဆေးဝါးကွပ်ကဲရေးဌာန (FDA) ရဲ့ အတည်ပြုချက် ရယူရမှာလည်း ဖြစ်ပါတယ်။

နောက်တက်မယ့် အမေရိကန်အစိုးရအဖွဲ့အတွက် မရေရာ မသေချာမှုတွေ ရှိနေတယ် ဆိုတာကိုလည်း သမ္မတ Trump က ပထမဆုံးအကြိမ်အဖြစ် ထည့်သွင်းပြောဆိုသွားပါတယ်။

သူ့အစိုးရအဖွဲ့အနေနဲ့ "ဘယ်လိုအခြေအနေမျိုးမှာဖြစ်ဖြစ်" ကိုဗစ်ရောဂါကြောင့် လုံးဝ ပိတ်ပင်ကန့်သတ်တာမျိုး လုပ်မှာမဟုတ်ပေမယ့် Mr. Biden သမ္မတဖြစ်လာရင်တော့ လုပ်မှာပဲဆိုတာမျိုးလည်း သမ္မတ Trump က ပြောသွားပါတယ်။

Crd VOA News