ပြင်သစ်သမ္မတ ကိုဗစ်ရောဂါ ကူးစက်ခံရ
ပြင်သစ်သမ္မတ Emmanuel Macron မှာ ကိုဗစ်ပိုး စစ်ဆေးတွေ့ရှိခဲ့တယ်လို့ အစိုးရက ကြေညာလိုက်ပါတယ်။
သမ္မတ Macron မှာ အစပိုင်း ကိုဗစ်လက္ခဏာ စတွေ့လို့ ဆေးစစ်ခဲ့ရာကနေ ဒီနေ့ပဲ အခုလို ပိုးတွေ့ခဲ့တယ်လို့ ပြင်သစ်သမ္မတရုံးက ကြေညာတာပါ။
သမ္မတ Macron အနေနဲ့ စည်းမျဉ်း၊ စည်းကမ်းတွေနဲ့အညီ နောက်ထပ် ၇ ရက် သီးသန့်ခွဲနေသွားပြီး အလုပ်တွေကို အဝေးကနေ ဆက်တာဝန်ထမ်းဆောင်သွားမယ်လို့ ဆိုပါတယ်။
သမ္မတ Macron မတိုင်ခင် ကိုဗစ်ဖြစ်ခဲ့တဲ့ နိုင်ငံခေါင်းဆောင်တွေကတော့ အမေရိကန်သမ္မတ Donald Trump၊ ဗြိတိန်ဝန်ကြီးချုပ် Boris Johnson နဲ့ ဘရာဇီးသမ္မတ Jair Bolsanaro တို့ဖြစ်ကြပါတယ်။
ဒီဗိုင်းရပ်စ်ကြောင့် လူပေါင်း ၁.၆ သန်းသေဆုံးပြီး စုစုပေါင်း ၇၄ သန်းကျော်ကူးစက်ခံလာရချိန်မှာ အဆိုးဆုံးခံနေရတဲ့ အမေရိကန်နိုင်ငံမှာတော့ ဒုတိယမြောက် ကိုဗစ်ကာကွယ်ဆေးအတွက် တရားဝင် အတည်ပြုနိုင်ရေးလုပ်ငန်းစဉ်တွေ ဒီနေ့စတင်မှာဖြစ်ပါတယ်။
အမေရိကန် အစားအစာနဲ့ ဆေးဝါးကွပ်ကဲရေးအဖွဲ့ FDA ရဲ့ ကာကွယ်ဆေးအကြံပေးအဖွဲ့အနေနဲ့ Massachusetts ပြည်နယ်အခြေစိုက် Moderna ကုမ္ပဏီနဲ့ အမျိုးသားကျန်းမာရေးအဖွဲ့တို့ ပူးတွဲဖော်ဆောင်နေတဲ့ ကာကွယ်ဆေးအချက်အလက်တွေကို စစ်ဆေးမှာဖြစ်ပါတယ်။
VOA News
ယခုကဲ့သို့ နောက်ဆုံးရသတင်းများနှင့် သိရှိလိုသော ဒေသဆိုင်ရာအချက်အလက်များကို www.winnetmyanmar.com နှင့် winnetmyanmar Facebook Page တို့တွင် ဝင်ရောက်ဖတ်ရှု ရေးသား ဆွေးနွေးနိုင်ပါသည်။